|
नोकरीच्या ठिकाणी महिलांचा लैंगिक छळ होत असल्यास त्यांना तक्रार करता यावी, यासाठी केंद्र सरकारने Sexual Harassment electronic Box अर्थात SHe- बॉक्स हा उपक्रम सुरू केला आहे. सरकारी किंवा खाजगी, अशा कोणत्याही क्षेत्रात नोकरी करणाऱ्या महिलांना नोकरीच्या ठिकाणी लैंगिक छळ होत असल्यास त्याची तक्रार सहज करता यावी, हा या उपक्रमाचा उद्देश आहे.
महाआयटीच्या कर्मचाऱ्यांसाठी सुद्धा आम्ही अशा प्रकारची यंत्रणा तयार केली आहे. या यंत्रणेमार्फत कामाच्या ठिकाणी लैंगिक छळाचा सामना करणारी कोणतीही महिला तक्रार नोंदवू शकते. आम्ही आमच्या सर्व कर्मचार्‍यांचे संरक्षण, आत्मसन्मान आणि हिताला प्राधान्य देतो. प्रत्येकाला आदर आणि समानतेने वागवले जाईल असे आणि कोणत्याही प्रकारच्या लैंगिक छळापासून मुक्त असणारे कार्यस्थळ प्रदान करण्यासाठी आम्ही वचनबद्ध आहोत. या संदर्भात आम्ही खालीलप्रमाणे अंतर्गत तक्रार समिती स्थापन केली आहे.
लैंगिक छळाच्या प्रकरणांच्या संवेदनशीलतेची जाणीव आम्हाला आहे. यासंदर्भातील सर्व तक्रारींची दखल घेत निष्पक्ष पद्धतीने तपास केला जाईल, तसेच प्रत्येक प्रकरण अधिकाधीक गोपनीयतेने हाताळले जातील.
तुम्ही लैंगिक छळाची कोणतीही घटना अनुभवल्यास किंवा साक्षीदार असल्यास, त्याची त्वरित तक्रार करणे आवश्यक आहे. एक साधा अर्ज भरून तुम्ही अशा घटनेची तक्रार करू शकता किंवा वरील तक्त्यामध्ये दिलेल्या संपर्क तपशीलांचा वापर करून तुम्ही संपर्क साधू शकता. मोकळेपणाने बोला आणि तुमची तक्रार गांभीर्याने घेतली जाईल याची खात्री बाळगा.
तक्रार प्राप्त झाल्यानंतर महाआयटीची ‘अंतर्गत तक्रार समिती’ सखोल आणि निष्पक्ष तपास सुरू करेल. सर्व संबंधित पक्षांच्या गोपनीयतेचा आदर करून गोपनीय पद्धतीने तपास केला जाईल. तपासातील निष्कर्षांच्या आधारे महाआयटी योग्य ती कारवाई करेल.
वैयक्तिक आकसातून किंवा सूडबुद्धीने तक्रार करण्यास आम्ही प्रतिबंध करतो. निव्वळ सूडबुद्धीने खोटी व तथ्यहीन तक्रार करणे, हे कंपनीच्या धोरणाचे गंभीर उल्लंघन मानले जाईल आणि त्यानुसार कठोर कारवाई केली जाईल.
